"Pilotarekin". Haur-hezkuntzarako abestia

 Abesti hau Estefanía Guzmán eta Vicente Valverdek konposatutako lana da. Haiek Ba-Ba Haur Hezkuntzarako musika ekimeneko sortzaileak dira eta haurrekin musika lantzeko proposamen asko dituzte.

Ekarri dizuedan honetan oso modu atseginean landu dezakegu pultsazioa haurrekin.  Asmoa da pultsua gorputzaren zati batzuk pilotarekin kolpekatuz eramatea, baita ezkerreko nahiz eskuineko eskua erabiliz ere. Bikoteka ere egin daiteke, kantaren letraren arabera pilota bikotearekin trukatuz. Hemen duzuen bideoan ba-ba proiektuko kideek erakusten digute nola egin behar dugun.

Musikako bertsiorik bakarra aurreko bideokoa denez, eta asko gustatu zaidanez, moldaketa musikala eta ahotsa jarri diot (mila esker Arantzazu letra euskaratzeagatik!). Hementxe uzten dizuet prestatu dudan bideotxoa baita audio deskargarriak ere:

PILOTAREKIN ahotsarekin

PILOTAREKIN ahotsa gabe

Ukelelearentzat akordeak sortzeko txantilloia

Aurten ukelelearekin hasi gara lanean, eta hasieran zailtasunari eta antolaketari buruzko zalantzak banituen ere, gaur egun mundiala dela esan dezaket; oso-oso gomendagarria.

Gure hastapenetarako bideo batzuk prestatu nituen lehen akordeak lantzeko UKEOKE aplikazioan oinarrituz, baina askoz praktikoagoa iruditu zait txantilloi bat sortzea bideoak askoz errazago egin ahal izateko; horrela, ukelelearekin interesatzen zaidan edozein abesti errazago sortu dezaket.

Lankide baten oparitxoa aurkikuntza moduan baliatuta (miiiiiiiila esker Garazi!!!!!), Gizakia izan nahi dut abestirako bideo bat egin dut txantilloi hau erabiliz ukelearekin jotzeko.

Norbaiti bere sorkuntzak egiteko txantilloi hau interesatzen bazaio, hemen partekatzen dut, eta animatuko bazinaten erabiltzera egokia litzateke zuen lanak ere partekatzea, denon artean eskolako errepertorioa aberasteko. Animo denoi eta musikaz gozatu!

Sinkopa ikasteko abestia

Gelan badira zaia azaltzeko diren kontzeptu teoriko batzuk, eta horien artean, niretzat behintzat, sinkopa da. Puntutxoa abestian bezala, kanta honen helburua hitz erritmikoak erabiltzea izango litzateke erritmoa barneratzeko.

Jakinda da teoria gabe ere ikasleak gai izaten direla imitazio zein errepikapenaren bitartez erritmo hori egiteko, dena den gerorako identifikazioa da lortu nahiko nukena kanta honen melodiaren bidez.

Hori izan da bilatu dudana abesti honen bidez; alde batetik identifikazioa, bestetik barneratzea eta azkenik azalpen teorikoa sendotzea. 

Ukelelea eta txirula eskolan!

 Aurten eskolan aldaketa ugari biziko ditugu eta ilusioz beteta nago. Pandemia aurretik gure eskolan hamarkada batzuen zehar txistua izan zen musika-praktikaren protagonista; nere lehendabiziko bi ikasturtetan hori irakatsi egin nuen.

Ondoren, pandemiak ekarritako etenaren ondorioz eskolarako izan nahiko nukeen ibilbide musikala birplanteatzeko aukera izan dut; DOn afinatutako musika-tresna desberdinak jotzen ikasiko bagenituen gelako orkestrazioak aberastuko genituzke.  Ukelelea nolabait sartu nahi nuela oso argi neukan zoragarria delako; halere, ukelea oso gustukoa izan arren  zalantza ugari izan ditut: nola antolatu gelan, ikasleak ala eskolak erostea, afinazioa, ukeleleen kopurua... baina musika-mintegiari esker esperientzia desberdinak ezagutu ditut eta gutxi-gorabehera planifikazioa eratu dut nire buruan.

Txirularekin aldiz ez nuekan hain argi, baina honek indargune handiak ditu: institutoan erabiltzen den tresna da, oso merkea eta irakurketa-interpretazio prozesua aldiberean egiten da, beraz musika-saiotan ere bere tokia izango du.

Txirula 2. ziklotik aurrera erabiliko dugu plaka instrumentuekin batera eta hirugarren zikloan ukeleleak bikoteka erabiliko ditugu txirula eta plakakin batera. 

Ukelelea lantzeko materiala dagoeneko prest daukat. Bertan sortu ditudan bideo batzuk jasotzeaz gain, irakasle desberdinen materialak bildu ditut: Antton Jauregi, Judith Pijuan,  Nathan Walby  eta Toni Gallart.

Animatzen zarete ere? Baliagarria izango zaizuelakoan hemen partekatzen dizuet materiala. 

3. zikloko musika-koadernoa

 3. zikloan erabiltzeko koadernotxoa prestatu dut. Horrela, osatuta gelditzen da etapa osorako materiala. Gogoratu nahi dizuet material honen egilea Mª Lourdes Leal dela, hemen doakizuedana material honen egikotzapena eta itzulketa da. Berriro ere eskertu nahi diot bere lana; beste batzuen artean, bera izan zen sortzearen eta partekatzearen gogoa piztu zidanetako bat. 

Koadernoa deskargatzeko idatzi korreo bat eta beti bezala nahi duenari bidaliko diot. Ikasturte ona opa dizuet!

.

Haur-hezkuntzarako abesti bilduma

Haur-hezkuntzan erabiltzen ditudan abestiak denborarekin poliki antolatu ditut eta material guztia (fitxak, audioak eta bideoak) WIX honetan bildu ditut modu deskargarrian eduki ahal izateko. Den-denak ez daude, baina gehiengoak behintzat bai. 

Niri gauzak horrela biltzea oso erosoa iruditzen zait eta interesgarria ala lagungarria zaizuelakoan ere partekatzen dizuet.

Danborradako marrazkiak

Danborradako marrazki pare bat partekatzen dizkizuet. Umeena orain dela hiru urtekoa da, zaldiena aldiz labetik berri-berri aterata!

Marraz-gramak

Marraz-grama izenarekin definitu nahi dut entzuketa aktibo bat burutzeko jarduera hau.
Marraz-gramen helburua da marrazki bat osatzea abestiaren esaldi musikalen egitura jarraituz trazuen bidez. 

Intonazioa praktikatzeko bideoak

Bideo hauetan, oihartzunen bidez, noten irakurketa eta intonazioa praktikatuko dugu.

SOL-MI

DO-MI-SOL

DO-MI-SOL-LA

DO-RE-MI

DO-RE-MI-SOL

SI-LA-SOL

DO-RE-MI-FA-SOL

RE-MI-FA-SOL-LA

DO-RE-MI-SOL-LA-DO´

Iturria: Ainhoa Sukia

MI-FA#-SOL-LA-SI

Kodaly

Gernikako bonbardaketa.

Atzo, apirilak 26, 83 urte bete dira Gernika  bonbardatua izan zela. Aurten gai hau 6. mailan landu nahi nuen baina bizitzen ari garen egoera dela eta, ezin izan dugu behar bezala egin. 

Dena den, gertaera honi buruz jakin eta ausnartu dezakegu etxean gaudela eta hortaz, hemen partekatzen dizuet sortu nuen materiala. Kultura-iturri batzuk baliatuz (Francisco Escudero, Picasso eta Ken Zazpi) umeek gertaera hau ezagutu dezakete. 

Memoria historikoa ezinbestekoa da oraina eta etorkizuna  ulertzeko, iraganeko gertaerak ezagutu behar ditugu izandako erruak ez errepikatzeko, barkatzeko, injustizien kontra mugitzeko, gerren kontrako aldarrikapena egiteko...

Klikatu irudian eta iraganera bidaiatu! 

Udaberria iritsi da!

Kaixo familiak,

Nahiz eta etxetik ezin atera, jarduera sorta bat proposatzen dizuet udaberriari ongietorria emateko. Jarduera hauek eskolako txikiengan pentsatzen sortu baditut ere, animatzen den edonork probatu ditzake. Lau jarduera dira:  hiru bideo eta laugarrena,  jolas interaktibo batzuk.

Lehenengo bideoa ipuina da. Zenbat gauza gertatzen dira udaberrian!

Bigarren bideoa erritmograma bat da. Eskolako tresnak ez ditugunez, etxean daukagun edozein materiala erabili dezakegu erritmoa eramateko. Hau da nire proposamena:

1. Loretxoak:  plastikozko botila eta goilara bat elkarren artean perkutitzeko.
2. Txoriak: lapiko txikia eta goilara.
3. Tximeletak: bi zartagin tapak txindata moduan erabiltzeko.

Hirugarren bideo honetan esku jolas bat proposatzen dizuet.

Eta azkenik jolas hauek egin ditzakezue.

Bihotzez, espero dut Vivaldiren udaberriarekin disfrutatzea!! Besarkada bat.

Maitetxo itsasoan dago

Kaixo guztioi,

Ah ze egoera bizitzen ari garen, bihotzez espero dut ondo egotea! Egun hauetan espiritua alaitzeko asmoz sortu ditut "Maitetxo" abestia lantzeko hiru bideo. 

Euskal Herrian  kanta hau ezagutzen dugu Argoitia nebarrebei esker, baina jatorriz kanta eskoziarra da, Bring back my bonnie to me izeneko kanta herrikoia. 
Ingelesez bertsio asko dauden arren, euskaraz nik dakidala ez daude asko. Sortu dudana espero dut gustuko izatea eta gozatzea.

Lehenengo bideoan nik abesten dut (ahotsa); bigarrenean aldiz, isil-isilik egongo naiz  zuen txanda baita (karaokea); eta azkenengoan gorputz perkusioa egiteko proposamen bat prestatu dizuet.

Perkusioa goilarekin

Goilarak folklorean oso erabiliak diren tresnak dira. Askotan ikus ditzakegu trikitilariekin batera jota, fandango eta arin-arinetan.

Ez naiz aditua, baina salseatzen oinarrizko erritmo batzuk ikasi ditut eta zuekin konpartitu nahi dut. Egingarriak iruditzen zaizkit eta gelan gure musika herrikoia lantzen dugunean modu honetan egitea oso polita izan daiteke. Tutorial honetan ikasi dudana konpartitzen dizuet: aholkuak eta zenbait oinarrizko erritmo.

Eta hoberena ikasitakoa praktikan jartzea denez, fandango honetan proba dezakezue. Aupa zuek!

Erritmograma "The legend of the 1900"

Oinarrizko irudi erritmikoak errepasatzeko sortu dut bideotxo hau. Goza dezazuela espero dut!

"Bach-en Minuettoa" erritmograma.

Hirugarren mailan 3/4 konpasa lantzen dugu eta erritmograma hau oso aproposa da erritmo hirutarra barneratzeko.
Minuettoa musika-tresnekin jo baino lehen,  binaka jarrita egiten dugu bata bestearekin eskuak kolpatuz modu honetan: 

1-izterra (azentua)
2-txalo (pultsua)
3-eskuak elkar kolpatuz (pultsua)

 

"Merkatu persiar batean" erritmograma.

Erritmograma honekin oinarrizko irudi erritmikoak errepasatuko ditugu: kortxeak, beltzak, zuriak eta haien isiltasunak.

"Baba Yaga" erritmograma.

Baba Yaga, Mussorgskyren "Erakusketa baten koadroak" obra osatzen duten margoetako bat da. Pieza laburra eta indar handikoa da eta gelan guztiz bizitzeko asmoz erritmograma hau sortu dut. Goza dezazuela espero dut!

 

"My Sharona" Proposamen erritmikoa.

"My Sharona" The Knack taldearen kantarik ospetsuena da. 1979an argitararu zen eta oso kanta potentea da, nire faboritoenetako bat.

Praktikatuko eta biziko dugu proposamen honen bidez. Beharko dugun materiala bitxia eta sinplea da: irakurtzen zaudeten liburu bat, bi errotulagailu eta kartulina. Arraro xamar, ezta?

Zin dagizuet emaitza kuriosoa eta dibertigarria dela, bideo honetan ikus dezakezuen moduan, eta animatuta bazaudete denbora galdu gabe has gaitezke!

Hemen daude abestian zehar egin beharko ditugun erritmo guztiak bukle moduan, beraz lehenengotik hasi eta ongi ateratzerakoan hurrengoa saiatu! Ispilu moduan daude, errezagoa izan dadin ;-)

Ostinatoa

Eskema musikal baten etengabeko errepikapenean datza ostinatoa. Batzutan errepikatzen dena melodia zati bat izan daiteke ala erritmo bat; besteetan melodia eta erritmoa nahastuta izan daitezke ostinatoa osatzen dutenak. Abesti ospetsu honetan oso ongi antzeman dezakegu ostinatoa. Hasieran agertzen da eta abesti osoan zehar luzatuko da.

Orain gure txanda iritsi da eta musika-tresnak hartuta ostinato erritmiko batzuk praktikatuko ditugu bideo honi esker!

"Can can" Offenbach. Proposamen erritmikoa

Jacques Offenbach  Alemanian jaiotako konpositorea eta biolontxelojolea izan zen. Halere, denborakin Frantzian nazionalizatu zen. Opera komikoaren asmatzailea izateaz gain, eragin handiko konpositorea izan zen XIX. mendean.

Bi proposamen erritmiko hauek Offenbachen Orfeus infernuan operako zatirik ezagunenari dagozkie. Perkujole bihurtu beharko zarete bi bertsio hauei aurre egiteko; bata bestea baino zailagoa.

Beraz, makilak hartu eta hasi probatzen! Ziur nago pila disfrutatuko duzuela, nik behintzat oso ondo pasatu dut! Animatu eta kontatu ea zer moduz moldatu zareten!